Caplutta da Nossadunna dalla neiv Schlans

La caplutta Nossadunna dalla neiv schai sin il grep da Sais agl ur dil vitg. Il liug nua che la caplutta secatta, para da gia esser staus el temps prehistoric da gronda muntada. Sco quasi tut ils sanctuaris ella vischnaunca da Trun ei era quel construis en stil baroc. Ils mirs-baselgia ein structurai entuorn ed entuorn cun artgs tschocs (Blendbogen) che sebrattan giu cun pilasters. Ton ils artgs sco ils pilasters ein fatgs mo pigl egl, decoraziun senza funcziun statica.

Il tetg dalla nav ei construius en lenn. Ina particularitad ei denton il tetg da slondas, in material ch’ei vegnius appreziaus pli tard (suenter ils 1900) dils cerchels dalla protecziun dalla patria sco bien e bi material da baghegiar indigen. Oz ein las slondas svanidas dils biars tetgs en Surselva.

Igl altar ha duas alzadas: il maletg digl altar a bass muossa Nossadunna francada da s. Ignazi e s. Luregn da Brindisi. Da mintga vart ina petga e daspers las figuras da s. Franzestg e s. Antoni da Padua. Suren ei ina biala statua barocca da Nossadunna (1680). La caplutta ha era ina sempla laupia construida en lenn. Il crap da fundament dalla caplutta da Nossadunna dalla neiv ha il pader Giusep Pontenico, caputschin dalla claustra dalla missiun retica da Brixen, tschentau ils 23 da matg 1679.

Ils 25 da zercladur 1683 eis ella vegnida consecrada alla Sontga Trinitad ed a Nossadunna dalla neiv entras igl uestg da Cuera Ulrich VII von Federspiel. 1719 ha Johann Battista Ernst da Lindau al lag Bodan culau ils dus zenns per la caplutta che cloman aunc oz ils cartents ad urar. Igl onn 1932 ei igl altar vegnius renovaus ed ha tier quella caschun survegniu in niev maletg. A caschun dalla renovaziun la mesadad dils onns 90 han perscrutaziuns geologicas mussau ch’il fundament egl ost ed el vest schai sin differentas plattas, aschia ch’ei dat sfessas sur l’entrada ed el chor gia pervia da pintgas stremblidas. Quei po era esser ina raschun, daco ch’ins ha buca baghegiau gia pli baul en quei bellezia liug in monument „per la pli gronda honur da Dieus“. La radunonza dalla pleiv s. Gieri ha elegiu igl onn 1995 ina cumissiun da baghegiar e surdau a quella l’incarica da prender a mauns la renovaziun necessaria. La renovaziun ei gartegiada e stada finida igl onn 1998.

Patrocini: s. Trinitad Nossadunna dalla neiv (5 d‘uost)
Construcziun: 1679-1680
Consecraziun: 25 da zercladur 1683
Davosa renovaziun: 1998

La clav per ina viseta ei da retret tier 081 943 10 81.