Caplutta da s. Catrina Campliun
S. Catrina ei il pli vegl sanctuari sin territori dalla vischnaunca da Trun. Tier la renovaziun da 1658 han ins bein alzau mirs e plantschius e dau alla caplutta finiastras ed in pierti. La fuorma da basa ei denton aunc adina quella da 1590.
La pictura murala
Remarcabels ein oravontut ils maletgs vid ils mirs dalla nav, scuvretgs per gronda part pér anno 1943. Da maun seniester il marighel dils apostels, mintgin culs attributs usitai (p.ex. s. Pieder cun las clavs dil parvis e culla tiara, la cruna papala; s. Andriu cun la crusch diagonala (donnegiau); s. Giachen il vegl cun fest e vestgiu da pelegrin (veseivel mo per part) Cristus levaus dils morts stat alla testa da ses discipels. Sur siu tgau sesanfla igl orsal 1612 ed il monogram digl artist Hans Jakob Greutter.
Enzacons maletgs han pitiu duront la renovaziun da 1658: cun rumper ora las finiastras encunter munt ed encunter miezdi han ins donnegiau ina part dallas picturas. La scena dalla scavazzada da s. Catrina, oriundamein curclada vi dil maletg da s. Paul (apiestel cun la spada, gest sper igl altar lateral seniester), ei copiada sur la porta-caplutta e refatg silsuenter il maletg digl apiestel. Vid il mir da maun seniester, davontier, in „ecce homo“: Cristus presenta sias plagas, circumdaus dils instruments dalla passiun. Dasperas ina representaziun (donnegiada) da s. Michel, il peisa-olmas dil giuvenessendi, Nossadunna cun gl’affon Jesus enamiez in splenduront tschupi da radis, circumdada da simbols e tetels marians, dasperas s. Catrina cun sia caplutta da Campliun giudapeis e s. Antoni, avat. Davostier, vid la preit sper la porta-caplutta, igl uoppen dalla claustra da Mustér; s. Placi, il scavazzau tonscha per in lenziel, da l’autra vart il marter s. Bistgaun.
Ils altars
Enamiez igl altar principal (1750-60) paradescha ina statua empau lunganida da s. Catrina cun ses attributs (la roda sfraccada e la spada, ils uaffens da siu marteri). Il tabernachel (1683) deriva dalla baselgia da Nossadunna. Ils altars laterals (1660) cuntegnan maletgs da s. Antoni da Padua e s. Flurin (maun dretg) e dall’uniun mistica da s. Catrina cun gl’affon Jesus (seniester, suravi s. Placi). Sigl altar da maun seniester steva pli baul ina bellezia statua gotica da Nossadunna cugl affon Jesus sin bratsch. Ella vegn attribuida a Jakob Russ, il renomau sculptur schuob che ha fatg igl altar principal ella catedrala da Cuera (Poeschel). Per tema che la statua vegni engulada, han ins mess ella en in liug pli segir a Trun.
Patrocini: s. Catrina d‘Alexandria (25 da november)
Construcziun: circa 1590
Consecraziun: 14 d’uost 1592
Davosa renovaziun: 1998
La clav per visitar la caplutta ei da retrer tier 081 943 33 43.