Caplutta da s. Valentin Cartatscha

La caplutta da Cartatscha ei guess buca la gronda sin territori da vischnaunca. Sias mudestas dimensiuns vegnan denton pli che cumpensadas dalla rihezia digl altar e dils maletgs. La representaziun dall’encorunaziun da Maria el chor ed ils maletgs vid ils arviuls en general han ina garnitura ordvart gaglia en fuorma da tschupials e pindels colurai. Ils ornaments domineschan quasi ils maletgs. Zun decorativa ei era la penda flurida che va sur ils mirs dalla nav. Igl altar che muossa il patrun s. Valentin (en ornat d’uest) ensemen cun s. Bistgaun ei da stuc marmorau.

Vid igl artg che separa chor e nav secatta ina seria da scenas ord la passiun e levada da Cristus. Giudem quei artg, sil mir davon ils bauns, paradeschan las sontgas Dorothea (cun in canaster tgemblaus cun fluras) e da l’autra vart Barla (cun ina tuor sin maun).

Remarcabels ei era in maletg votiv da 1712 vid la preit encunter damaun. Sin quel vegn ei mussau co ins hagi pudiu tscharner duront la construcziun dil baghetg «ina biala clara glisch» el liug nua ch’igl altar dueva vegnir tschentaus. Ils da Cartatscha han capiu quei segn dil tschiel ed eregiu leu lur altar.

Patrocini: s. Valentin (7 da schaner)
Construcziun: 1699 (?)
Consecraziun: 26 dazercladur 1706
Davosa renovaziun: 1931

La clav per visitar la caplutta ei da retrer tier 081 943 24 59.