Baselgia s. Giachen Zignau
Las baselgias d’avon 1931
In document dils 28 da november 1487 menziunescha ina caplutta da s. Cristoffel a Zignau. Igl onn 1509 vegn ina baselgia da s. Giachen consecrada, carteivel suenter ch’ins veva renovau ni construiu da niev la caplutta da 1487. 25 onns suenter la fundaziun dalla caplania da Zignau, consecrescha igl avat da Mustér la baselgia da s. Giachen, in sanctuari cun treis altars. Biebein 200 onns pli tard ei quella baselgia ida cun la bova dils 25 da settember 1927. La ba-selgia era drizzada encunter miezdi ed el sid dil chor steva il clutger cun in tetg en péz ault e git. Il curtin dalla pervenda dad oz schai en quei liug nua che la baselgia veglia veva ses fundaments, igl altar principal sesanflava leu nua ch’ins vesa oz il sontget. Per grond cletg ha la bova buca disfatg il chor dalla baselgia: ils treis altars, il tabernachel e la scantschala ein vegni spindrai ed han survegniu in niev suttetg en baselgia nova.
La baselgia hodierna
L’entrada sefa entras in pierti sin petgas toscanas, in element architectonic che la baselgia veglia veva buc. Avon e suenter ils survetschs divins vegn quel nezegiaus stediamein sco liug da sentupada e cusseida.
Igl altar grond
Igl altar grond (ca. 1713) consista ord duas alzadas e s’avischina cheutras al tip dils altars barocs vallesans. Enamiez la part giubass sesanfla il maletg principal che representa Nossadunna cun ils dus patruns-baselgia. Da mintga vart da quel ein treis petgas en fuorma da spirala cun feglia d’acantus che sestartuglia ordentuorn.
Digl exteriur encunter il centrum vegnan las petgas pli e pli graschlas e cuortas e dattan aschia l’illusiun da profunditad. Il tabernachel el stil rococo ei vegnius vitier pér entuorn igl onn 1760. El stat davon il maletg principal si e zuppenta in bien ton da quel.
Las treis bellezia statuettas sil tabernachel representan las vertids „cardientscha“, „carezia“ e „speronza“. Dil medem temps sco il tabernachel ei igl antipendi (part davon la meisa digl altar giu) cun sia reha decoraziun da conchiglias ed elements florals. Ell’alzada sura digl altar serepetan ils medems elements sco giusut: in maletg che muossa l’encorunaziun da Nossadunna cun quella ga da mo duas petgas da mintga maun e suravi puspei in artg. Las statuas dretg e seniester representan s. Martin e Sontgaclau. Sisum diltut il monogram da Cristus (IHS), accumpignaus da duas statuettas da s. Giachen e s. Glieci.
Ils altars laterals
Ils altars laterals da stil baroc, fabricai circa 1670, ein construi in sco l’auter: il maletg digl altar ei enramaus da duas pet-gas e cuvretgs dad in arviul rut en fuorma da treipez. Quels elements serepetan in’alzada pli ad ault e vegnan encorunai d’in monogram cun in tschupi da radis. Ils maletgs representan encunter nord ils sogns Luregn, Bistgaun e Maria Madleina e suravi ils sogns Placi e Sigisbert. Il maletg grond da tschei maun han ins allontanau per postar leu ina statua moderna da Nossadunna; sisuren in maletg da s. Culastia.
Patrocini: s. Giachen il vegl(25 da fenadur) e s. Cristoffel
Construcziun: 1929-1931
Consecraziun: 25 da matg 1931
Davosa renovaziun: 1982-1991
La baselgia ei aviarta duront il di.